कमलनाथ होणार मध्य प्रदेशचे मुख्यमंत्री ?

काँग्रेसचे ज्येष्ठ नेते आणि प्रदेशाध्यक्ष कमलनाथ हे मध्य प्रदेशचे पुढचे मुख्यमंत्री असतील. भोपाळमध्ये काँग्रेस विधिमंडळाच्या बैठकीत त्यांच्या नावावर शिक्कामोर्तब झालं असून, यासंदर्भात पक्षाध्यक्ष राहुल गांधी अंतिम निर्णय घेतील, असं सूत्रांकडून सांगण्यात आलं. 

मध्य प्रदेशात १५ वर्षांनंतर काँग्रेस पक्ष सरकार स्थापण्याच्या तयारीत आहे. त्यात मुख्यमंत्री कोण होणार, यावर दिवसभर काथ्याकूट करण्यात आला. भोपाळमध्ये आज पक्ष विधिमंडळाची बैठक झाली. त्यात कमलनाथ यांच्या नावाला सर्व आमदारांनी सहमती दर्शवल्याचं कळतं. मुख्यमंत्रिपदाच्या शर्यतीत असलेल्या ज्योतिरादित्य सिंधिया यांनीच त्यांच्या नावाचा प्रस्ताव मांडला आणि त्याला सगळ्यांनी अनुमोदन दिलं, असं सूत्रांकडून सांगण्यात येतं. 'मुख्यमंत्री कोण असेल याचा निर्णय राहुल गांधी घेतील, असं विधिमंडळाच्या बैठकीत एकमतानं ठरलं,' असं काँग्रेसच्या प्रवक्त्या शोभा ओझा यांनी पत्रकार परिषदेत सांगितलं.