कामचुकार कंत्राटदारांना काळ्या यादीत टाकण्याचा जिल्हाधिकाऱ्यांकडे प्रस्ताव

उपविभागीय अधिकारी एसडीएम खेडेकरांचा दणका   

हिंगोली / प्रतिनिधी  

जलयुक्त शिवार अभियान 2017-18 अंतर्गत वसमत उपविभागातील औंढा व वसमत तालुक्यातील गावांमधील जलसंधारणाची कामे करण्यासाठी निविदा धारकांना कार्यारंभ आदेश काढले होते.  विहीत कालावधीत कामे करण्याच्या सुचना असताना सुद्धा अद्यापपर्यंत काम सुरू न केल्याने या कंत्राटदारांना काळ्या यादीत टाकून त्यांची अनामत जप्त करण्यात यावी असा प्रस्ताव उपविभागीय अधिकारी प्रशांत खेडेकर यांनी 31 जुलै रोजी जिल्हाधिकारी कार्यालयाकडे पाठविला आहे. 

         वसमत उपविभागीय कार्यालयाअंतर्गत सन 2017-18 जलयुक्त शिवार अभियानाबाबत निविदा काढण्यात आल्या होत्या. यामध्ये वसमत व औंढा नागनाथ तालुक्यांचा समावेश आहे. कंत्राटदारांनी आपल्या संस्थेच्या नावे हे काम घेतले होते. पण या कामाची प्रत्यक्ष चाचपणी केली असता तालुका कृषि अधिकारी वसमत व तालुका कृषि अधिकारी औंढा नागनाथ यांच्या अहवालावरून अद्यापही काम सुरू केले नसल्याचे स्पष्ट झाले. उपविभागीय अधिकारी प्रशांत खेडेकर यांनी याची चौकशी करून कार्यवाहीचा प्रस्ताव जिल्हाधिकाऱ्यांकडे सादर केला आहे.

 यामध्ये वसमत विभागातील एकता मजुर सहकारी संस्था दारेफ ळ 2 कामे, रोकडेश्वर मजुर सहकारी संस्था पांगरा शिंदे 2 कामे, प्रल्हाद विश्वनाथ टोगे हिंगोली 13 कामे, विश्वास  जाधव नाथबाबा ट्रस्ट कनका 5 कामे, बालाजी मजुर सहकारी संस्था कोर्टा 2 कामे, रोहित लक्ष्मणराव बोलेनवार 4 कामे,  विश्वकर्मा मजुर सहकारी संस्था मर्या. लोहगाव 1 काम, रामसिंग मजुर सहकारी संस्था मर्या. साखरा 1 काम, महाराणा प्रताप मजुर सहकारी संस्था मर्या. भंडारी 1 काम, प्रियदर्शनी मजुर सहकारी संस्था मर्या. ढेगज 1 काम अशा स्वरूपाच्या निविदा संबंधित कंत्राटदारांनी भरल्या होत्या. यांना कार्यारंभाचे आदेश दिल्यानंतर सात दिवसांत काम करणे अनिवार्य होते. व तीस दिवसांत संपविणे आवश्यक होते. परंतू, उपरोक्त एकाही निविदा धारकांनी अद्यापपर्यत कामाला सुरूवात न केल्याने या कंत्राटदारांची नावे काळ्या यादीत टाकून सुरक्षा रक्कम जप्त करण्यात यावी असा प्रस्ताव उपविभागीय अधिकारी प्रशांत खेडेकर यांनी 31 जुलै रोजी जिल्हाधिकाऱ्यांकडे पाठविला आहे. यामुळे कामचुकार कंत्राटदारांचे धाबे दणाणले आहेत.