लोकसभा निकाल त्रिशंकू ?

लोकसभा निवडणुकीचे निकाल त्रिशंकू असतील, असा अंदाज एबीपी न्यूज आणि सी-व्होटरच्या सर्वेक्षणातून व्यक्त करण्यात आला आहे.
आगामी लोकसभा निवडणुकीत कोणत्याही एका पक्षाला किंवा आघाडीला बहुमत मिळणार नाही. सध्या सत्तेत असलेल्या भाजपच्या नेतृत्वाखालील एनडीएचं संख्याबळ २३३ पर्यंत घसरेल. त्यात भाजपला २०३ जागा मिळतील. काँग्रेसच्या नेतृत्वाखालील यूपीए १६७ जागांपर्यंत मजल मारेल. त्यात काँग्रेसच्या पारड्यात १०९ जाग पडतील. एनडीए व यूपीए वगळून अन्य पक्षांच्या पारड्यात १४३ जागा पडतील, असा अंदाज या सर्वेक्षणातून पुढे आला आहे.

महाराष्ट्रात आघाडीच नम्बर १
महाराष्ट्रात शिवसेना-भाजप युतीतील 'बिघाडी' काँग्रेस-राष्ट्रवादी आघाडीच्या पथ्यावर पडणार आहे. राज्यात लोकसभेच्या ४८ जागा असून आघाडीला २८ जागा मिळतील तर शिवसेना व भाजपला मिळून २० जागा मिळतील, असे चित्र आहे. गेल्या लोकसभा निवडणुकीत युतीला ४८ पैकी ४१ जागा मिळाल्या होत्यात. त्यात भाजपने २३ तर शिवसेनेने १८ जागांवर विजय मिळवला होता.

उत्तर प्रदेशात भाजपला मोठा फटका
केंद्रातील सत्तेचा मार्ग ज्या राज्यातून जातो त्या उत्तर प्रदेशात भाजपला मोठा फटका बसण्याची चिन्हे आहेत. सद्यस्थिती पाहता तिथे भाजपला २४ जागा तर भाजपच्या मित्रपक्षाला केवळ १ जागा मिळेल, असा अंदाज आहे. राज्यात सर्वाधिक ५१ जागा सपा-बसपा महाआघाडीला तर काँग्रेसला ४ जागा मिळतील, असे हे सर्वेक्षण सांगते.

गुजरातमध्ये मोदीलाट कायम राहणार
गुजरातमध्ये पंतप्रधान नरेंद्र मोदी यांचा प्रभाव कायम असल्याचे चित्र आहे. मोदींच्या होमपिचवर भाजपला २६ पैकी २४ जागा मिळतील तर काँग्रेसला केवळ २ जागांवर समाधान मानावे लागेल, असा अंदाज आहे. गेल्या निवडणुकीत भाजपने गुजरातमध्ये सर्व २६ जागा जिंकल्या होत्या.

मध्य प्रदेशात भाजप सावरणार
मध्य प्रदेशातील सत्तेने हुलकावणी दिली असली तरी लोकसभा निवडणुकीत भाजपचाच वरचष्मा राहणार असल्याचे चित्र आहे. राज्यातील २९ जागांपैकी भाजपच्या पारड्यात २३ जागा जातील तर काँग्रेस ६ जागा जिंकेल, असा अंदाज वर्तविण्यात आला आहे.

बिहारमध्ये एनडीए; प. बंगालमध्ये ममता
नितीशकुमार यांची साथ मिळाल्यामुळे बिहारमध्ये एनडीएचे पारडे जड राहणार आहे. बिहारमधील ४० पैकी ३५ जागा एनडीएला मिळतील तर ५ जागा राजद-काँग्रेस आघाडीला मिळतील, अशी शक्यता आहे. पश्चिम बंगालमध्ये मुख्यमंत्री ममता बॅनर्जी यांची जादू कायम असून तिथे ४२ पैकी ३४ जागा तृणमूल काँग्रेस जिंकेल, असा सर्वेक्षणाचा अंदाज आहे. छत्तीसगडमधील ११ जागांपैकी ५ जागा एनडीएला मिळतील तर ६ जागा यूपीएला मिळतील, अशी शक्यता आहे.