मुंबई : बिहारी महिलांच्या संदर्भात भाजप आमदार सुरेश धस यांनी वादग्रस्त विधान केले आहे. धस यांच्या या वक्तव्याचा राष्ट्रवादी काँग्रेसकडून निषेध करण्यात आला आहे. राष्ट्रवादी काँग्रेसचे आमदार जितेंद्र आव्हाड यांच्या मार्गदर्शनाखाली मंगळवारी दुपारी राष्ट्रवादी काँग्रेस कार्यालयासमोर धस यांच्या प्रतिमेला जोडे मारत काळे फासण्यात आले. यावेळी शहराध्यक्ष आनंद परांजपे, हिंदी भाषीक सेलचे अध्यक्ष प्रभाकर सिंह, जिल्हा उपाध्यक्ष संतोष तिवारी आदी उपस्थित होते.
‘बिहारचे लोक येतात आणि पेढा देतात. काय झाले, असे त्यांना विचारले तर मुलगा झाला असे सांगतात. कुठे झाला तर तिकडे झाला. ते राहतात इथे आणि त्यांना मुले तिकडे होतात’ असे वक्तव्य सुरेश धस यांनी बीड येथील एका जाहीर सभेत केले. यामुळे बिहारी महिलांचा अवमान झाला आहे; अशा आमदारांवर कारवाई करण्यात यावी, अशी मागणी करीत शहराध्यक्ष परांजपे यांच्या नेतृत्वाखाली जोरदार निदर्शने करण्यात आली.
यापूर्वीही भाजपाचे विधान परिषदेतील सहयोगी आमदार प्रशांत परिचारक यांनी पंढरपूर येथील प्रचार सभेत लष्करातील जवानांच्या पत्नीबाबत वादग्रस्त वक्तव्य केले होते. त्यानंतर आता सुरेश धस यांनी अशाप्रकारचे वक्तव्य करुन भाजपची संस्कृती काय आहे, हे दाखवून दिले असल्याचे मत आनंद परांजपे यांनी मांडले. महाराष्ट्रामध्ये राहून अशा पद्धतीने आमच्या माय-भगिनींचा अवमान करण्याचे धाडस या लोकांचे होतेच कसे? भाजपने त्यांच्या चिंतन बैठकीमध्ये धस यांच्यासारख्या प्रवृत्तींवर चिंतन करावे, असे सांगून ‘उत्तर भारतीयोंके सन्मानमे राष्ट्रवादी अब मैदान’मे, असा नारा त्यांनी दिला.
No comments:
Post a Comment