नवी दिल्ली :-
नोटाबंदीदरम्यान २०१६-१७ या वर्षात नोटांच्या छपाई खर्चात वाढ झाली. हा खर्च ७, ९६५ कोटी रुपयांवर पोहोचला, अशी माहिती सरकारनं संसदेत दिली. नोटाबंदीनंतर स्टेट बँकेचे तीन कर्मचारी आणि बँकेसमोरील रांगेत एका ग्राहकाचा मृत्यू झाला, अशी कबुलीही दिली.
राज्यसभेत नोटाबंदीसंदर्भात विचारलेल्या प्रश्नावर केंद्रीय अर्थमंत्री अरुण जेटली यांनी लेखी उत्तर दिले. नोटाबंदी लागू झाली त्या वर्षी छपाईचा खर्च ७,९६५ कोटी रुपयांपर्यंत पोहोचला. मात्र, २०१७-१८ या आर्थिक वर्षात हा खर्च कमी होऊन ४,९१२ कोटी रुपयांवर आला. नोटाबंदीच्या आधी २०१५-१६ या वर्षात नोटांच्या छपाईसाठी ३,४२१ कोटी रुपये खर्च झाले होते, अशी माहितीही जेटली यांनी दिली. छपाई केलेल्या नोटा देशभरात वितरीत करण्यात आल्या. त्यावर २०१५-१६, २०१६-१७ आणि २०१७-१८ या वर्षात अनुक्रमे १०९ कोटी, १४७ कोटी आणि ११५ कोटी रुपये खर्च झाले, असंही त्यांनी सांगितलं.
नोटाबंदीच्या काळात जुन्या नोटा बदलण्यासाठी लोकांच्या बँकांसमोर रांगा लागल्या होत्या. त्याचा तपशील केवळ स्टेट बँकेनं दिला आहे. त्यात बँकेसमोरील रांगेत एका ग्राहकाचा आणि बँकेच्या तीन कर्मचाऱ्यांचा मृत्यू झाल्याची माहिती आहे. नोटा बदलण्यासाठी रांगेत उभे राहिल्याने, कामाचा अतिरिक्त ताण आदी कारणांमुळं व्यक्ती आणि बँक कर्मचाऱ्यांचा मृत्यू, तसंच मृतांच्या कुटुंबीयांना दिलेली नुकसानभरपाई याबाबतची माहिती स्टेट बँक वगळता अन्य कोणत्याही सार्वजनिक क्षेत्रातील बँकेनं दिलेली नाही, असंही जेटलींनी स्पष्ट केलं. नोटाबंदीच्या काळात तीन कर्मचारी आणि एका ग्राहकाचा मृत्यू झाल्याची माहिती स्टेट बँकेनं दिली आहे. मृतांच्या नातेवाईकांना नुकसानभरपाई म्हणून ४४.०६ लाख रुपये देण्यात आले. त्यातील तीन लाख रुपये मृत ग्राहकाच्या नातेवाईकांना दिले, अशी माहिती त्यांनी दिली.
No comments:
Post a Comment