मुंबई : भारतीय रेल्वेने तिकीटांचे दर न वाढवता उत्पन्न वाढवण्याकडे लक्ष केंद्रीत केले असल्यामुळे सर्व विभागांना उत्पन्न वाढवण्याचे विविध मार्ग शोधून काढण्याच्या सूचना देण्यात आल्या आहेत. मध्य रेल्वेने यानंतर महसुली उत्पन्न वाढवण्यासाठी वेगळाच पर्याय शोधला आहे. आता कर्मचाऱ्यांच्या सॅलरी स्लिपवर मध्य रेल्वे जाहिराती छापणार आहे. विशेष म्हणजे एका बाजूला सरकार डिजिटल इंडियाला चालना देत असताना, दुसरीकडे रेल्वेकडून अद्याप सॅलरी स्लिप छापल्या जात आहेत.
याबाबत रेल्वेच्या एका अधिकाऱ्याने फक्त सॅलरी स्लिपवरच नव्हे, तर वातानुकूलित एक्स्प्रेस गाड्यांमध्ये दिल्या जाणाऱ्या बेडशीट आणि नॅपकिनच्या कव्हरवरसुद्धा विविध कंपन्यांच्या जाहिराती छापल्या जाणार असल्याची माहिती दिली. यंदाच्या वित्तीय वर्षात जाहिरातींच्या माध्यमातून सर्वाधिक उत्पन्न मिळवण्यात मध्य रेल्वेच्या मुंबई विभागाने पहिले स्थान पटकावले असल्यामुळेच उत्पन्न वाढवणाऱ्या नव्या संकल्पनांना गांभीर्याने घेतले जात आहे.
सॅलरी स्लिपवर जाहिराती देण्यास ‘गृह कर्ज देणाऱ्या कंपन्या तयार असून दरवर्षी जवळपास डझनभर कंपन्यांनी पाच ते सहा लाख रुपये खर्च करण्याची तयारी दर्शवली असल्याचे रेल्वेच्या अधिकाऱ्याने सांगितले. रेल्वेला यासारख्या जाहिरातींमधून जवळपास एक कोटी रुपयांचे उत्पन्न मिळण्याची अपेक्षा असून हा निर्णय रेल्वेची आर्थिक स्थिती सुधारण्यासाठी घेण्यात आला आहे. एकूण ३६ हजार कर्मचारी मध्य रेल्वेच्या मुंबई विभागात काम करतात. प्रशासनाकडून कर्मचाऱ्यांना दिल्या जाणाऱ्या सॅलरी स्लिपवर दरवर्षी अडीच लाख रुपये खर्च केले जातात. या जाहिरातींमुळे कर्मचाऱ्यांच्या स्टेशनरीवर होणारा खर्च आणि अन्य खर्च वाचवता येईल, असे रेल्वेच्या अधिकाऱ्याने म्हटले आहे.
No comments:
Post a Comment